話說蕉小編之前一直用開Covermark嘅Cleansing Milk用曬，咁要買支係洗面奶嘅代替品，因為用Foam的話我太乾，Summer可以,但秋冬我完全唔ok!於是我就買咗呢支SUQQU煥顏柔潤潔膚霜(台灣網友命名的，因為我完全揾唔到有香港人介紹）。
買左接近一個月，我一直都係當佢洗面膏咁用，但係每次洗面，我都有一種好怪嘅感覺，就係呢支洗面膏完全唔起泡，一路洗面佢一路溶曬落手，直頭唔知佢想點… 😛 (但又唔係洗得唔乾淨，而且洗完仲一啲都唔乾…)只係唔起泡令我覺得洗極都唔乾淨嘅感覺(我好煩XD)
又因為我嘅洗面產品實在太多，諗住呢支唔好用，我咪用第二支囉。之但係每次我睇雜誌見到啲人話SUQQU點樣好用，我就唔順氣，點解呢支洗面膏會削成咁?於是前幾日我就上網揾下呢支洗面膏嘅用法呀、介紹、評語咁啦。點之係數埋手指都無唔夠五篇…
然後然後，我又去日本官網再睇下咩料先，但係都係一貫洗面嘅介紹…最後，我去厠所拎起支SUQQU黎睇下，佢個名係”Comfort Melt Cleansing Cream”(一直無留意佢大名XD)…唔…有個Melt字…我再諗左一諗，唔通佢係用黎卸妝嘅? 當晚，我就一嘢唧咗一陀落手 (乾手乾面），直接撻上面…奇怪嘅事黎啦，我捽下捽下，發現原來佢真係一支有卸妝功能嘅洗面膏XDDD，唔知咁，佢仲要係連Waterproof嘅眼睫毛膏都完全落得好！乾！淨！
錯有錯著，因為呢一年我皮膚狀態非常唔穩定，一向敏感嗰啲唔洗多講，最慘係乾皮又狂出油，搞到我鼻頭嗰啲毛孔又粗又大。所以我由洗面嗰part開始經已慎重換過好多產品，唯一一樣我從來無換過嘅就係用卸妝油(因為我習慣用waterproof嘅化妝產品，所以一定要用油先落得乾淨)。試咗呢個全新嘅卸妝方法，睇下過一排皮膚會唔會有改善再同大家分享。
一個月後，我終於知道SUQQU嘅好用唔係假㗎！大家有興趣可以買黎試下，呢支係蕉小編嘅誠意推介。
（下次買嘢前記得睇清楚先好買，白白浪費左我半支洗面膏XD）
下篇文章見
mytwinsy 歡迎以原文形式轉載及註明出處，如有發現抄襲，版主必定會向平台擁有人作出投訴
。